Eru allir týndir....

Sæl verið þið! eru allir hættir að nota þessa fínu síðu okkar?

Kæru ættingjar og tilheyrandi!
Við Stína viljum byrja á því að þakka fyrir alveg stórkostlega samverustund í Reykjanesi í sumar. Það er fátt betur
fallið til að hrista saman fjölskyldur en svona samfagnaðir.
Nú fer í hönd hundraðasta og tíunda aldursár afa Jóns. Af því tilefni blásum við til afmælisveislu helgina 9. – 11. júlí n.k. en þann 10. er afmælisdagur afa Jóns. Eins og margir þeirra sem voru í Rykjanesi í sumar muna, þá var ákveðið að ég skyldi halda utan um afmælið hérna á Vopnafirði. Skemmst er frá að segja að ég er búinn að festa aðstöðu í Syðri-Vík í Vopnafirði (slóðin er http://www.sveit.is/FarmDetails.aspx?No=490) og nú er um að gera að fara að láta okkur vita um þátttöku. Fjórtán manns geta sofið í gistirými þarna sem er í fyrrverandi fjárhúsi og hlöðu, fínasta aðstaða og hægt að leigja sér rúmföt. Þá er aðstaða fyrir tjöld, tjaldvagna, fellihýsi og húsbíla eins og við þurfum. Fyrir þennan tíma og þessa aðstöðu (þ.e. gistinguna og tjaldsvæðið)þurfum við að greiða 60.000.- óháð fjölda þeirra sem þarna verða. Fyrir utan þetta þá eru tvö sumarhús þarna á svæðinu sem einnig er hægt að fá leigt. Síðan er spurning um hvort stemming er fyrir sameiginlegri máltíð á laugardagskvöldinu. Kostnaður við það yrði að sjálfsögðu utan við aðstöðugjaldið.
Þema afmælisins verður, „skemmtilegar sögur af afa og ömmu“ í ykkar orðum. Þið getið sett niður á blað og flutt sjálf eða fengið einhvern annan til þess að flytja fyrir ykkur ef þið treystið ykkur ekki til.
Þátttöku tilkynningar ásamt gistingarmáta væri gott að fá sem allra fyrst á netfangið gusgu@simnet.is því að auðvitað er grunnurinn að því að þetta geti orðið sá að sem allra flestir mæti. Hljóðfæri eru vel þegin í afmælið og flott væri að stofna ættarhljómsveit þarna og gildir þá einu hvort um ættingja eða tilheyrandi er að ræða.
Endilega látið okkur vita sem allra fyrst,
Bestu kveðjur,
Gunnar Smári og Stína

Munið að panta gistingu!

Kæru ættingjar!
Ég vil bara minna ykkur á að það er vissara að vera ekki síðastur að panta sér gistinguna. Við ætlum að reyna að koma því þannig fyrir að fjölskyldufólk með börn geti verið á sér-merktu tjaldstæði sem aðeins er ætlað þeim sem eru með börn, og/eða vilja meiri rólegheit og að fara snemma í háttinn. Ég fékk það líka staðfest í dag, að öll verð sem upp voru gefin fyrr á árinu standast, þannig að engin auka útfjöld ættu að koma í ljós eins og stundum vill verða. Ég gleymdi annars að taka það fram að maturinn á laugardagskvöldið er steikt lambalæri í ofni og er ókeypis fyrir börn yngri en 12 ára. Það er líka ókeypis í sundlaugina, svo munið að taka með sundföt svo enginn þurfi að notast við pappakassa um sig miðjan eins og einn fjölskyldumeðlimur forðum daga. Svo er líka hljóðkerfi á staðnum, þannig að ef sönghópar eða aðrir listamenn eða ræðumenn innan fjölskyldunnar luma á einhverju gleðispreðandi, er bara um að gera að leyfa hinum að njóta. Sérstaklega skora ég á yngstu kynslóðina að leyfa ljósi sínu að skína sem skærast í leikjum, söng , dansi eða hverju sem gleðja kann okkur gamlingjana.
Sjáumst!
Hidda.

Það styttist í ættarmót

Sæl verið þið öll til sjávar og sveita (oghvarsemþiðeruðniðurkominsvosem).

Það styttist óðfluga í ættarhitting og nú ætti það að vera nokkuð ljóst hversu fjölmennt verður. Spurning hvort einhver hefur haldið utan um það. Við Stína ætlum allavega að mæta, veit ekki hvort afkvæmin og viðhengin koma. Jóna, Gummi og Margrét Ólafía verða nýkomin frá Svíþjóð og óvíst hvort þau sjá sér fært að framlengja fríið sitt, Magga (Jóna Guðný og Rolf) komin á seinni hluta meðgöngunnar og því ekki gott að segja til um hvort þau treysta sér til að leggja land undir hjól af þeim sökum. Þetta verður víst allt að koma í ljós.
Að öðru, við fengum heimsókn um daginn, Alla, Sighvatur, Erla og Davíð kíktu í kaffi til okkar. Fórum og skoðuðum Bustafellsbæinn, þar var mikið um að vera, Safnadagurinn svokallaði og mikið líf í gamla bænum. Ég held að þeim (eins og svo mörgum öðrum) hafi þótt frekar gaman að koma þarna við, allavega þótti okkur vænt um að fá þau til okkar og njóta samvistanna sem hefðu þó mátt vera lengri.
Ekki meira að svo stöddu,

Bíðum spennt eftir því að hitta ykkur sem flest á ættarmótinu,
Kv,
Gunnar og Stína

Ættarmótið staðfest og ákveðið!

Sæl verið þið aftur nær og fjær, til sjávar og sveita! Jæja þá er þetta nú allt ákveðið varðandi ættarmót afkomenda Jóns Valdimarssonar og Sigríðar Ásgeirsdóttur. Staðurinn er Reykjanes við Ísafjarðardjúp, en þar hafa sum okkar hittst áður og höfum ágæta reynslu af. Dagsetningin er 7.-9. ágúst. Eins og þið hafið eflaust frétt, þá voru nokkuð margir sem töldu sig ekki getað komið um verslunarmannahelgina sem var áður frátekin fyrir okkur í Sælingsdal og því var planinu breytt. Hér á eftir set ég því inn upplýsingar fyrir ykkur um umsamið verð á gistingu og tjaldstæðum og ég tek það fram að hver og einn verður að panta herbergi/ tjaldstæði og eða aðra þjónustu fyrir sig, þannig er það einfaldast og enginn einn aðili er gerður ábyrgur fyrir pöntunum. Bara taka skýrt fram að hann/hún tilheyri hópnum sem helgin er frátekin fyrir.En ef þið viljið tryggja ykkur gistingu innandyra, er betra að panta fyrr en seinna því við rennum svolítið blint í sjóinn með hversu fjölmennt þetta verður.

Hér kemur svo verðið:
Einstaklingsherbergi uppábúið kr. 4.500,-
2 manna herbergi uppábúið kr. 8.500,-
Svefnpokapláss kr. 3.000,- pr.rúm
tjaldstæði; fyrsta nóttin kr. 1500,- hver aukanótt 500,-
óháð fjölda í tjaldi.
Sameiginleg máltíð á laugardagskvöldinu kostar 3.200,-
Það er ókeypis í sundlaugina.

Forstöðumaður staðarins heitir Gunnar Línberg sem tekur við herbergjapöntunum. Síminn þar er; 456 4844

Varla þarf að taka það fram að ALLIR sem hafa einhverntíma tengst fjölskyldunni, þ.e. fyrrverandi, núverandi ævarandi eða tilvonandi makar og meðlæti eru velkomnir!
Kveðjur og knús í allar áttir,

Hidda, sími 5680021 og 8693079. gunnhildurjons@gmail.com
Síminn hjá Þórdísi Einars er 5645066 og 8621831 thordisster@gmail.com
Svo er netfangið hjá Margréti Gunnhildi Gunnarsdóttur sem líka hefur boðist til að vera hjálpleg, mgg@akmennt.is

Ættarmót í pípunum

Það hringdi í mig lítill fugl (eða frænka) og bað mig um að taka þátt í að undirbúa ættarmót í sumar.
Hún var búin að athuga með laust pláss á Laugum í Sælingsdal og sá staður er laus um verslunarmannahelgina.
Mig langar bara að athuga hvort menn eru spenntir fyrir ættarmóti og hvort þessi tími hentar betur eða verr og hvaða staðir væru þá á óskalistanum ef þessi er ekki hentugur.
Endilega setjið athugasemd, sendið póst á mig á thordisster@gmail.com eða á Hlíðarvegspúkagrúppuna á fésbókinni ef menn eru komnir þar inn. Nú og ef menn eru ekki með tölvu þá má alltaf hringja í "litla fuglinn" aka Hiddu frænku.
Og koma svoooo!
Kveðja
Þórdís

Jólakveðjur úr Melgerði 10

Kæru systkini og frændfólk!
Þá eru nú jólin að nálgast enn einusinni eins og óð fluga, svo tíminn er orðinn knappur til að koma út öllum jólakortunum sem maður vildi sent hafa. En þá kemur nú þessi bloggsíða okkar aldeilis að góðum notum svona ef einhverjir eru enn að lesa hana. Við hérna í Melgerðinu sendum ykkur öllum nær og fjær, til sjávar og til sveita okkar innilegustu jóla og nýjárskveðjur með þökk fyrir samskiptin á liðnu ári.
Af okkur er það helst að frétta að við tvö; gamlingjarnir, verðum hér á fróni í ár, enda voru bæði jól og áramót haldin í Noregi í fyrra. Í ár verða Hulda og Max fjarri góðu gamni því þau eru farin til Þýskalands ásamt Elínu litlu og verða þar fram yfir áramót. Árni aftur á móti er kominn heim í jólafrí frá London, en skólinn hans byrjar ekki aftur fyrr en þann 13. janúar. Við munum því vera ýmist hjá Elsu í Grundarlandi, eða öll hérna heima í Melgerðinu yfir jóladagana.
Vona svo bara að sem flestir haldi áfram að nota þessa litlu samskiptasíðu okkar svo að kveðjur og smá fréttapistlar komist til skila þegar við sendum það inn.
Bestu jólakveðjur frá okkur öllum,
Hidda Herjolf og Árni
Melgerði 10 Reykjavík.