Taka tvöö...

Jæja, ég er búinn að grandskoða allar myndir, og við eigum bara ekki fjölskyldumynd !!

Bætum bara úr því seinna :) . En hérna er prufa..

Kær kveðja til allra.... Höddi hálfsjö :)

Myndin er tekin á jóladag 2004

Kveðja frá Hödda

Komið þið sæl og blessuð öll fjölskyldan. Það er eins og með margt annað, að það er búið að taka sinn tíma að koma sér að verki og fara að gera eitthvað af viti hérna á síðunni. Það er orðið ansi langt síðan ég hef hitt flest ykkar, og þau ykkar sem ég hef þó hitt, þá hefur það verið fyrir algera slysni, en svona er þetta bara.
Eins og sum ykkar vita, þá er ég búsettur í Mývatnssveit, og hef búið undanfarin ár. Ég er að vinna fyrir verktakafyritæki hérna á svæðinu, (ennþá í sandkassanum :) ) og kann bara vel við mig hérna.
Við erum fjögur í heimili, sambýliskonan mín heitir Jónína Baldursdóttir (40), yngsta dóttir hennar, Steinunn Ósk (10), og svo perlan mín hún Álfheiður Kristín (11), sem hefur búið með okkur í vetur,
Og svo ég (39) svo að glöggir lesendur sjá að meðalaldur fjölskyldunar er rétt tuttugu og fimm ár :)
Ég er mikið búinn að leita að heimildarmynd af okkur, en ekki fundið neina (alltaf einhver á bak við myndavélina) En ég finn eitthvað………

Kær kveðja í bili……
Hörður Sigurjón Karlsson
Birkihrauni 7
660
Reykjahlíð
Mývatn
Vision@mi.is S 4642201-8454960

Nei engin mynd núna...

Kveðjur frá Huldu og Elínu Snæfríði

Hæ og hó fjölskylda

Bara stutt í dag því ég er að prufa hvort ég fatti forritið, ef það virkar allt hjá mér þá skal ég skrifa betur við allra næsta tækifæri.

En fyrst þetta :

Ég og litla 6 mánaða hosan mín hún Elín Snæfríður erum í örstuttri heimsókn hjá Hiddu ömmu og Herjolfi afa, venjulega búum við í Lundi í Svíþjóð og í Osló. Í dag kom Þórdís í heimsókn og var að sjálfsögðu með Benedikt litla með sér. Myndin var tekin við það tækifæri.

Meira seinna, bestu kveðjur, Hulda

Smá tilkynning!

Hæ og hó, Hulda kemur á morgun frá Lundi með litla stelpustýrið sitt hana Elínu litlu Snæfríði og þær ætla að stoppa í viku og vilja hitta sem flesta. Er kannske einhver sem getur lánað hoppirólu?

Áskorun !

Ég tek undir þetta hjá Hiddu og fleirum. Við þurfum að fá fleiri að deila með okkur hvað þeir eru að gera þessa dagana.
Hvernig væri að Flosi og Gunnar Smári myndu til dæmis ota því að sínum börnum að skrifa nokkrar línur hingað inn ?
Hver veit nema Gunnar Smári gæti haft áhrif aðeins lengra og náð til bræðrabarna sinna. Ég skal reyna að hafa áhrif á systkini mín sem hafa ekki látið heyra í sér hérna.
Ég sjálf er orðin hálf feimin við að vera alltaf að rífa mig hérna inni. Það bæri ekki eins mikið á því ef fleiri myndu taka þátt ;o)

Þetta smá mjakast hjá okkur!

Sæl aftur og takk fyrir síðast! Já og velkomin á bloggið okkar Ella og Flosi! Það var orðið hálf fúlt að vera sú eina af "eldri kynslóðinni" sem reyndi að vera með í þessu, en nú virðist vera kominn skriður á hlutina fyrst fleiri eru að bætast við. Samt er ég nú að vona að þið sem yngri eruð, semsagt börn og barnabörn okkar upphaflegu Hlíðarvegspúkanna, farið að láta oftar í ykkur heyra. Tilgangurinn með síðunni var jú einmitt sá að stuðla að sambandi ykkar á milli, svo ættartengslin gliðni ekki svona fljótt. Sjálfri finnst mér alveg drullufúlt að börnin mín þekki ekki öll börnin hinna systkina minna og þá ekki heldur þeirra börn. En tíminn líður svo fljótt og þau ykkar sem voru með horinn niður á maga fyrir nokkrum andartökum síðan eins og Gunnar Smári orðaði það svo undurfallega í gær, eruð dreifð um víðan völl og hittist varla nema við jarðarfarir eða eitthvað enn minna skemmtilegt. Og þá er jafnvel spurt: "Mamma hverjum varstu að heilsa?" ´"Nú þetta var hún Halldóra Víðisdóttir hennar Jónu hans Adda, .....eða.... hann Kalli Stebbason hennar Öllu,......... eða.... Hva!.. mannstu virkilega ekki eftir henni Ingu Stínu hans Flosa hennar Öllu?"
Svona nú, látið í ykkur heyra! Hver veit nema ykkur verði þá smalað saman á ættartreff í sumar. Þá væri nú gott að vera búin að fá að vita smávegis um hvað þið eruð að gera, að hugsa, eða að hugsa um að gera.
Kveðja til allra, Hidda.

Það er erfitt lífið innst í Fagraholtinu, nánar tiltekið í nr.13 og 14 Flosi og Ella sitja sveitt við að fá eitthverjar skýringar á því undarlega fyrir bæri sem heitir Hlíðarvegspúka blogg. Flosi fær ekki sína tölvu til að makka rétt. þ.e.hann kemst alls ekki inn með millinafni okkar ástkæru móður. Hver skýringin er fæst ekki botn í , svo að við sitjum hér systkynin Ella og Flosi og klórum okkur í lubba og skalla. Héðan er annars allt sæmilegt að frétta snjóflóð og yndislegheit, ekki hundum út sigandi svo við settumst við niður og ákváðum að reyna. Annars er þessi bloggsíða nú sennilega skemmtilegri og fróðlegri fyrir yngri kynslóðina heldur en okkur " Gömlu" stykkin en samt er nú svo að við skoðum hvert orð sem út á pistlinum kemur og gleðjumst yfir öllum þeim sem láta til sín heyra. Það að setja inn myndir er eitthvað sem verður að bíða betri tíma, því að kunnáttan er ekki enn upp á marga fiska. en okkur fer fram með hverjum degi sem líður svo ekkert er ómögulegt. Flosi biður sérstaklega að heisla Gunnari Smára og Stínu einhversstaðar í Langbortistan og svo nátturlega sendum við hveðjur til allra sem hafa bloggað til þessa, og líka þeirra sem ekki hafa enn lagt í tækniundrið. Höfuð og herðar ættarinnar á Vesturhorninu

Jón Valdemarsson og Sigríður Ásgeirsdóttir

Sæl verið þið, til hamingju með daginn um daginn Þórdís. Ótrúlegt hvað tíminn líður hratt, krakkaormarnir sem maður man eftir með hor niður á maga bara orðin fullorðin, farin að búa og allt.
Hvernig er það, er ekki hægt að láta myndina af afa og ömmu byrtast við hliðina á "Hlíðarvegs 25 púkonum" þarna efst uppi, þannig að þau vaki yfir síðunni. Gæti verið gaman ef hægt væri að koma því við.

Til hamingju með afmælið Þórdís!

Laugardagur 10. mars, bjartur og fagur! Vonandi tekst ykkur að flytja inn í nýja húsið í dag elsku Þórdís mín. Til hamingju með það líka!
KV. Hidda.

Heimasíður fjölskyldumeðlima

Halló allir
Vil bara minna á listann yfir þau sem eru með heimasíður hérna til vinstri. Ef þið vitið um fleiri endilega látið vita svo ég geti bætt þeim þarna inn.
Annað vil ég líka benda á, neðst á síðunni er teljari og hann er kominn yfir 500 þegar þetta er skrifað. Það þýða rúmlega 500 heimsóknir síðan ég setti hann upp. Þykir það meget gott!
Svo er líka gestabók, yrði fínt að þeir sem skoða bara (eru ekki komnir inn ennþá) merki við í gestabókina svo ég sjái hversu dreift þetta er. Það á ekki að vera erfitt að kvitta þar. Annars er líka hægt að kvitta í athugasemdum undir hverri grein, bara að smella á "að rífa sig" og skrifa smá skilaboð. Ef þið eru ekki með login þá er auðveldast að merkja við "anonymous" og vola!
Bestu kveðjur
Þórdís

sæl öll frændsystkin nær og fjær

verð bara að byrja á að pústa....úff úff úff.... held þetta hafi nú tekist í þetta sinn.....búin að sitja sveitt og ekki bara einbeitt heldur mjög, mjög einbeitt við tölvuna og fara samviskusamlega eftir fyrirmælum Þórdísar til að komast hér inn! Þið sjáið þetta þá ef það hefur tekist.

Takk Þórdís mín fyrir aðstoðina. ....Annars hitti ég Dagnýju frænku og Dóra í dag, eða öllu heldur rakst ég á þau á hlaupum inn í Húsgagnahöllina í dag og þar komumst við að því að við vorum sammála um hvað tæknin væri nú mikil í dag (hljómar eins og tvær gamlar konur hafi verið að ræða saman)..... og einnig því að Þórdís frænka hlyti að vera kynslóð yngri en við...ef ekki tveimur... þetta segir nú ýmislegt um okkur.

Gaman að heyra frá ykkur hér og endilega látið þetta berast svo fleiri líti inn á síðuna okkar og spjalli. Frábær vettvangur.
Hef þetta ekki lengra í bili....ætlaði að sofna snemma í kvöld en er enn alveg að fara að sofa
b.kv.til ykkar allra
Fríða Halldórs

Takk fyrir myndirnar Gunnar

Ég þakka Gunnari fyrir myndirnar og finnst hugmyndin frábær. Þarf bara að sortera þær eftir "genum og gunnum". (stofnfumurannsóknir eru ekki heimilaðar ennþá því miður) En þá er líka mikilvægt að þær séu rétt merktar þannig að enginn ruglingur verði. Þess vegna ætla ég að koma með smá leiðréttingu á fjölskyldumyndinni af Halldóru ömmu því það voru nokkur atriði sem ekki voru rétt:
Á myndinni fyrir miðju er Halldóra Pétursdóttir Zar, mamma hennar Sigríðar ömmu ykkar (mömmu) á Ísafirði. Bönin hennar frá vinstri á myndinni eru:
Sigríður Ásgeirsdóttir fædd 7. september 1903, dáin 1981, gift honum Jóni sínum og ættmóðir okkar allra.
Þórunn Ásgeirsdóttir fædd 17. apríl 1898 dáin 1996, ógift og barnlaus.
Í fangi ömmu Halldóru situr "Diddi frændi" Ásgeir Einar Jóhannesson, yngsta barnið og hálfbróðir hinna. Hann er fæddur 1913, dáinn 1990.(Kvæntur "Billy" Þuríði Edvald og þau áttu Gunnar, Samúel og Jóhönnu Halldóru (Hönnu Dóru).
Kristín Álfheiður Ásgeirsdóttir fædd 1897, dáin 1918 í spönskuveikinni sem þá geisaði. Ógift og barnlaus.
Gunnhildur Ásgeirsdóttir fædd 1902, dáin 1975, ógift og barnlaus.
Á myndina vantar Kristján Ásgeirsson sem fæddur var 1899, dáinn 1992. Hann varð snemma ekkjumaður og einstæður faðir með 1 barn, hana Eddu frænku okkar sem er kennari í MH
og býr í Reykjavík.
Vona að fleiri eigi eftir að senda myndir og að einhver tölvuklárinn (þorði ekki að segja nördinn) finni þörf hjá sér til að skipuleggja albúmið.
Bestu kveðjur til allra, Hidda.

Halló, halló

Sæl verið þið aftur,
þarf ekki að stofna myndaalbúm inni á síðunni? Gæti verið gaman að safna myndum þar inn og flokka eftir stofnfrumum þannig að ljóst sé hver er út af hverjum.

Sennilega mynd af starfsfólki Klæðskerastofu Einars og Kristjáns. Sigríður Ásgeirsdóttir og Gunnhildur Ásgeirsdóttir fyrir miðju í aftari röð. Svolítið bil á milli þeirra.

Valdemar og Elín með Jón og Gunnu.

Valdemar Jónsson pabbi Jóns Valdemars Guðmundar Valdemarssonar.

Halldóra Pétursdóttir Zar með Ásgeir Einar Jóhannesson í fanginu, Sigríður Ásgeirsdóttir (mamma, amma, langamma o.s.frv.) lengst til vinstri, þá koma systur hennar, Þórunn (Tóta frænka) Kristín Álfheiður og Gunnhildur lengst til hægri

Svona leit settið út árið 2005, höfum lítið breyst síðan þannig að ef þið sjáið þetta fólk á ferli einhversstaðar, endilega heilsið þeim.

Loksins, loksins, loksins...........

Komiði sæl og blessuð, eins og maðurinn sagði.
Þar kom að því að við getum farið að hafa samband hvert við annað án þess að sjást eða heyrast. Gargandi snilld þessi hugmynd að síðunni. Endilega notið möguleikann á því að senda myndir, ekki bara af börnunum heldur líka af ykkur sjálfum. Það er örugglega mjög pínlegt ef að við hittumst einhverstaðar á förnum vegi og könnumst svona við svipinn en komum honum ekki alveg fyrir okkur, brosum vandræðalega og kinkum kolli án þess að vita hverjum maður er að heilsa. Svo þegar heim er komið, þá rennur upp fyrir manni, “já kannski var þetta hann Höddi hennar Ellu, eða Flosi hennar Öllu”. Þá kemur myndahornið á síðunni sér vel, bara fletta í gegnum það, og sjá. Þetta var þá eftir allt hann Gunnar Halldórs.
Nóg um það. Til hamingju með framtakið.
Ég var bara rétt í fyrradag að fá upplýsingar um að þessi síða væri komin í gang og að sjálfsögðu fór ég að leita mér upplýsinga um hvernig ég ætti að nota apparatið. Fyrst varð mér fyrir að leita upplýsinga hjá Hiddu, kom ekki aldeilis að tómum kofanum þar. “Gerðu bara svona og svona,!!!??? nei kannski ekki svona heldur hinsegin. Æ þetta virkar ekki þetta helv. Drasl. Hringdu í hana Þórdísi”. Ég hringdi í Þórdísi og hún leiddi mig í gegn um ferlið af þeirri ljúfmennsku sem ég hélt nú í einfeldni minni að væri ekki til staðar í fjölskyldunni. Hún varaði mig sérstaklega við því að skrifa beint inn á síðuna, nota frekar ritvinnsluforritið til þess að skrifa það sem ég ætlaði að birta og copera það síðan inn á síðuna til þess að glata því nú ekki ef síðan tæki ekki við fagnaðarerindinu. Þessu játti ég að sjálfsögðu, en þar sem ég var nú kominn inn í kerfið og var uppfullur af allskonar hugmyndum, mis gáfulegum að sjálfsögðu, þá lét ég vaða og skrifaði og skrifaði. Það var svo fyndið að þið hefðuð velst um í marga daga af hlátri. Nú nú, nema hvað, ég ýtti á send eða hvaðsemhannnúheitirtakkinnsemáaðnota, og upp kom melding um að síðan væri ekki lengur virk.
Ég grét mig í svefn og var með ekkasogum í morgun. Þetta kennir manni það að EKKI bara hlusta á það sem þér fróðari menn reyna að kenna þér, FARÐU EFTIR ÞVÍ.

Í fréttum er þetta helst.
Við höfum það bara býsna gott þessa stundina, Stína nýkomin af Kristnesi, var þar í endurhæfingu og búin að vera á sjöttu viku. Skildi mig aleinan og yfirgefinn heima. Til þess að kallinn horfélli nú ekki á þessum tíma þá var hún búin að útbúa í frystikistuna matarskammta langt fram á árið og merkt þá skilvíslega, mánudagur..... þriðjudagur.... osfrv. Þetta gekk allt vel til að byrja með, vandamálin hófust þegar nágrannarnir fóru að bjóða mér í mat, þá hætti dagtalið að ganga upp og meltingartruflanir fóru að gera vart við sig. Þið sjáið það sjálf að það er ekki hægt að borða mat sem merktur er “fimmtudagur” á sunnudegi.
En sem sagt, Stína er komin heim og nú færist lífið í eðlilegt horf aftur sem betur fer. Við áttum mjög gleðileg jól, fengum alla hersinguna til okkar, þ.e. börn barnabörn og fylgifiska. Verst hvað þessi tími líður allt of fljótt. Með myndir af barnabörnum þá farið þið inn á vefinn barnaland.is og finnið Margréti Ólafíu fimleikadrottningu og Jónu Guðnýu Pálsdóttur. Til þess að sjá myndirnar hjá Jónu Guðnýu þá þarf lykilorð. Ef þið munið seinna nafnið hennar Möggu þá getið þið notað það sem lykilorð.
Jæja,
Nú er mál að linni. Ég hvet alla fjölskyldumeðlimi til þess að skrifa inn á vefinn, og ef þið lendið í vandræðum með að komast inn í kerfið, hringið þá í Þórdísi, hún hjálpar ykkur við að komast í gang með allt saman.

Bestu kveðjur,
Gunnar Smári og Stína.

Eins og hendi væri veifað!

Já eins og hendi væri veifað, þá virkaði þetta allt í einu núna þegar klukkan er að verða 12. Ekki veit ég hvort Þórdísi hefur tekist að gera eitthvað hókus pókus, en allavega þá ´ætla ég að nota tækifærið og segja "SÆL AFTUR" Vona að Gunnari hafi tekist það sama og mér og að við fáum að heyra í honum sem oftast og stelpunum hans líka, Möggu og Jónu.

%&$%/*

Þar sem þið getið væntanlega giskað á hvað þetta þýðir þá skiljið þið að kerfið er ekki að hlýða því sem sagt er.
Gunnar, ég ætla að koma syni mínum í svefn áður en hann gerir út af við afa og ömmu, svo reyni ég aftur.
Kv.
ÞE

testing 1, 2, 3...

Prufa frá Gunnari Smára!